Verse 59.78

उलूकश्चाब्रवीद्रामं पादपैरुपशोभिता। यदेयं पृथिवी राजंस्तदाप्रभृति मे गृहम्॥ एतच्छुत्वा तु वै रामः सभासदमुवाच ह॥ न सा सभा यत्र न सन्ति वृद्धा वृद्धा न ते ये न वदन्ति धर्मम्। नासौ धर्मो यत्र न सत्यमस्ति न तत्सत्यं यच्छलेनानुविद्धम्॥ ये तु सभ्याः सदा ज्ञात्वा तूष्णीं ध्यायन्त आसते। यथाप्राप्तं न बुवते ते सर्वेऽनृतवादिनः॥ जानन वाब्रवीत्प्रश्नान्कामात्क्रोधाद्भयात्तथा। सहस्रं वारुणान्याशानात्मनि प्रतिमुञ्चति॥ तेषां संवत्सरे पूर्णे पाश एकः प्रमुच्यते। तस्मात्सत्येन वक्तव्यं जानता सत्यमञ्जसा॥ एतच्छ्रुत्वा तु सचिवा राममेवाद्वंस्तदा। उलूकः शोभते राजन्न तु गृयो महामते॥ त्वं प्रमाणं महाराज राजा हि परमा गतिः। राजमूलाः प्रजाः सर्वा राजा धर्मः सनातनः॥ शास्ता नृणां नृपो येषां ते न गच्छन्ति दुर्गतिम्। वैवस्वतेन मुक्तास्तु भवन्ति पुरुषोत्तमाः॥

ulūkaścābravīdrāmaṃ pādapairupaśobhitā| yadeyaṃ pṛthivī rājaṃstadāprabhṛti me gṛham|| etacchutvā tu vai rāmaḥ sabhāsadamuvāca ha|| na sā sabhā yatra na santi vṛddhā vṛddhā na te ye na vadanti dharmam| nāsau dharmo yatra na satyamasti na tatsatyaṃ yacchalenānuviddham|| ye tu sabhyāḥ sadā jñātvā tūṣṇīṃ dhyāyanta āsate| yathāprāptaṃ na buvate te sarve'nṛtavādinaḥ|| jānana vābravītpraśnānkāmātkrodhādbhayāttathā| sahasraṃ vāruṇānyāśānātmani pratimuñcati|| teṣāṃ saṃvatsare pūrṇe pāśa ekaḥ pramucyate| tasmātsatyena vaktavyaṃ jānatā satyamañjasā|| etacchrutvā tu sacivā rāmamevādvaṃstadā| ulūkaḥ śobhate rājanna tu gṛyo mahāmate|| tvaṃ pramāṇaṃ mahārāja rājā hi paramā gatiḥ| rājamūlāḥ prajāḥ sarvā rājā dharmaḥ sanātanaḥ|| śāstā nṛṇāṃ nṛpo yeṣāṃ te na gacchanti durgatim| vaivasvatena muktāstu bhavanti puruṣottamāḥ||