Verse 23.57

श्रुतं मया महाभाग बद्धस्त्वं विष्णुना पुरा॥ सोऽहं मोक्षयितुं शक्तो बन्धनात्त्वां न संशयः। एवमुक्ते ततो हासं बलिर्मुक्त्वैनमब्रवीत्॥ श्रूयतामभिधास्यामि यत्त्वं पृच्छसि रावण। य एष पुरुषः श्यामो द्वारे तिष्ठति नित्यदा॥ एतेन दानवेन्द्राश्च तथान्ये बलवत्तराः। वशं नीता बलवता पूर्वे पूर्वतराश्च ये॥ बद्धः सोऽहमनेनैवं कृतान्तो दुरतिक्रमः। क एनं पुरुषो लोके वञ्चयिष्यति मानवः॥ सर्वभूतापहर्ता वै य एष द्वारि तिष्ठति। कर्ता कारयिता चैव धाता च भुवनेश्वरः॥ न त्वं वेद न चैवाहं भूतभव्यभवत्प्रभुः। कलिश्चैवैष कालश्च सर्वभूतापहारकः॥ लोकत्रयस्य सर्वस्य हर्ता स्रष्टा तथैव च। संहरत्येष भूतानि स्थावराणि चराणि श्व॥

śrutaṃ mayā mahābhāga baddhastvaṃ viṣṇunā purā|| so'haṃ mokṣayituṃ śakto bandhanāttvāṃ na saṃśayaḥ| evamukte tato hāsaṃ balirmuktvainamabravīt|| śrūyatāmabhidhāsyāmi yattvaṃ pṛcchasi rāvaṇa| ya eṣa puruṣaḥ śyāmo dvāre tiṣṭhati nityadā|| etena dānavendrāśca tathānye balavattarāḥ| vaśaṃ nītā balavatā pūrve pūrvatarāśca ye|| baddhaḥ so'hamanenaivaṃ kṛtānto duratikramaḥ| ka enaṃ puruṣo loke vañcayiṣyati mānavaḥ|| sarvabhūtāpahartā vai ya eṣa dvāri tiṣṭhati| kartā kārayitā caiva dhātā ca bhuvaneśvaraḥ|| na tvaṃ veda na caivāhaṃ bhūtabhavyabhavatprabhuḥ| kaliścaivaiṣa kālaśca sarvabhūtāpahārakaḥ|| lokatrayasya sarvasya hartā sraṣṭā tathaiva ca| saṃharatyeṣa bhūtāni sthāvarāṇi carāṇi śva||